O portavoz do grupo, Emilio J. Sánchez Iglesias, lembra que a Estación de Monforte é unha infraestrutura clave para a mobilidade da cidade e da súa área de influencia, ademais de ser un foco de dinamización socioeconómica consolidado. “Aplaudimos que se acometan melloras nas infraestruturas, pero as obras están a desenvolverse cunha lentitude excesiva que está a xerar múltiples perxuízos ao tecido comercial e veciñal da zona”, afirma.

Desde o BNG sinalan que esta situación resulta aínda máis preocupante ao estarmos ás portas da tempada turística alta, momento no que a cidade recibe un maior volume de visitantes. “A actual desorganización das obras afecta negativamente á mobilidade, á imaxe da cidade e á actividade comercial e hostaleira da contorna”, sinala.

Ademais, o grupo nacionalista alerta sobre decisións concretas no deseño e execución da obra que consideran inadecuadas: a substitución de materiais tradicionais como a tella por chapa, a retirada de farolas históricas, a redución drástica de prazas de aparcamento nunha zona de recollida e descarga de pasaxeiros, ou a plantación de especies arbóreas con raíces agresivas para os pavimentos. “Non se pode entender unha obra pública que ignore os valores de conservación do patrimonio, a funcionalidade e o respecto polo entorno urbano. Urxe poñer orde e escoitar a veciñanza”, subliña Emilio Sánchez.

Por todo isto, o BNG solicita que o Concello convoque con urxencia unha Xunta de Voceiros na que estean presentes representantes de ADIF e a Subdelegación do Goberno, a fin de obter explicacións claras, avaliar alternativas e garantir que as obras rematen con garantías e sen continuar a causar prexuízos evitables á cidade.