A chegada da vaga de calor destes días volve poñer en evidencia as carencias dun espazo público pensado para crianzas, pero onde a falta total de sombra o fai inusable durante boa parte do día. A situación fixo que hai máis dun ano o BNG xa presentara unha moción, que foi rexeitada coa promesa de que se actuaría “en breve”.

O BNG quéixase agora de que aínda non se teña tomado ningunha medida, “O parque segue sen unha soa árbore nin zona de sombra, e isto non só é un problema de confort, senón tamén de saúde e seguridade para a infancia. Prometeron que actuarían e seguimos igual”, denuncia Manuel Luaces, concelleiro do BNG en Monforte.

Desde o BNG considérase imprescindible que os espazos públicos destinados á infancia sexan seguros e saudables tamén ante episodios de altas temperaturas, cada vez máis frecuentes debido á crise climática. “Ademais de mellorar a calidade ambiental e a estética urbana, a dotación de arborado fomentaría o uso comunitario do espazo e o benestar das familias. A cidadanía ten dereito a espazos públicos de calidade, e máis aínda cando falamos de zonas de xogo e de convivencia para a veciñanza máis pequena”, engade Luaces.