Adrián González, de 32 anos e vinculado ao deporte, agradece a confianza dos compañeiros e comprométese a desenvolver o labor “dende a responsabilidade que merecen os veciños e veciñas de Quiroga”.
Así mesmo, o novo voceiro apuntou a súa vontade de “aportar o meu gran de area, con ilusión e ganas de traballar” dentro dun equipo que busca “impulsar o Partido Popular, que estivo á fronte do goberno municipal durante 36 anos, para alcanzar a maioría nas vindeiras eleccións municipais”.
Adrián González releva a José Manuel Pol como portavoz do PP no Concello, unha vez formalizada a súa renuncia como concelleiro da corporación municipal. O Grupo Municipal Popular contará cun novo edil, Andrés Campo, que ocupará a acta como representante do Partido Popular.
Candia e Arza agradecen a González a “súa implicación” e convídano a traballar dende “a humildade” por un concello cun gran potencial vinculado tanto a Ribeira Sacra coma as montañas do Courel. Así mesmo, defenden que “só o traballo constante, dende a unidade e da man dos veciños permitirá á formación popular acadar os obxectivos que nos marcamos de cara ás vindeiras eleccións municipais”.
