O Concello de Monforte informa da interrupción programada da subministración de auga este martes, 8 de xullo, durante dúas horas, que se concretan dende as 10:30 horas ata as 12: 30 horas, e que vai afectar á marxe esquerda de Historiador Dalmiro de la Válgoma e nun tramo da marxe dereita de Escultor Francisco Moure que vai dende o Bar Cristal ata a rúa Dalmiro de Válgoma. Vaise proceder á conexión da nova tubaxe deste tramo de rúa, que se corresponde cunha primeira fase dos traballos de renovación da nova tubaxe de Escultor Francisco Moure.

A empresa concesionaria do Servizo de auga do Concello de Monforte de Lemos, Aqualia xa procedeu a notificar ós veciños afectados.

Por Chantada advirte DE que non se debe beber da fonte da Ponte

Lembran desde Por Chantada Interior Galego Vivo que a fonte precintouse hai unhas semanas cun cartel que poñía “no tocar”. “Ante a falta de información por parte do Concello e xa desprecintada a fonte, recollemos unha mostra pola nosa conta e levámola a un laboratorio a finais de xuño. Unha vez obtidos os resultados e consultados os datos conclúese que esa auga non é apta para o consumo humano”, aseguran desde Por Chantada.

Cos datos técnicos da analítica, informados por expertos, Por Chantada considera necesario evitar o consumo de auga desta fonte, “O ocultismo e a incapacidade deste concello nun tema tan básico como a saúde son reiterados e deberían producirse responsabilidades políticas co cese do responsable de non informar que a auga non é apta para o consumo”. Aseguran que o concello debería analizar as diferentes fontes públicas periodicamente e publicar un resumo do estado das mesmas, “así como informar puntualmente e coa debida difusión de calquera risco que para a saúde das persoas puidera supor o seu consumo, tomando ao tempo medidas de seguridade serias e efectivas para alertar cando non estea totalmente garantida a salubridade”.