Os concelleiros do PP de Ribas de Sil denuncian que o alcalde está a incumprir o acordo de inicio do mandato de convocar os plenos ordinarios cada dous meses.

A voceira popular, Sandra Macía, lamenta que “non se cumpra coa legalidade vixente” sobre todo “tendo en conta de que se trata dun acordo tomado por todos os concelleiros ao inicio do mandato e que nas sesións plenarias trátanse asuntos fundamentais para a veciñanza” como pode ser buscar solucións aos constantes cortes de luz que sofren os usuarios da residencia de maiores.

Sandra Macía sinala que “non é a primeira vez que se dá esta situación no presente mandato” e agarda que o alcalde “recupere de inmediato a normalidade na convocatoria” e así “poder defender os intereses de todos os veciños de Ribas de Sil”.