Na sesión plenaria do pasado luns 28 de xullo, na que se abordaron diversos temas de interese municipal do Concello de Monforte, procedeuse á celebración do Acto de entrega da Medalla e Insignia aos membros da Corporación Municipal, que tal e como establece o Regulamento de Honras e Distincións do Concello de Monforte de Lemos, debe ser imposta tras xurar ou prometer o cargo no acto solemne de constitución da Corporación Municipal, momento no que non estaba aprobado e motivo polo que se celebrou este acto no día de onte.
O regulamento establece nos artigos 23 e 24 o procedemento de imposición da Medalla do Alcalde e dos Concelleiros ou Concelleiras. No artigo 23 establécese como será a devandita medalla de Alcaldía: será de prata de lei con baño de ouro, en forma de óvalo alongado, en sentido perpendicular de 5 cm de alto e 4,5 cm de ancho; no que figurará no centro do anverso, en relevo e con incrustacións de esmalte, o campo do escudo heráldico do Concello en medidas de 4 cm de alto por 2,5 cm de ancho, orlando ou timbre coa coroa real e ao pé con caracteres en relevo a inscrición: Alcalde ou Alcaldesa. No reverso, sobre fondo azul terá unha lenda en dourado: Excelentísimo Concello de Monforte de Lemos. O cordón da Medalla terá as cores da bandeira galega, branco e azul.
No artigo 23 establécese tamén que a imposición da Medalla realizarase no solemne acto de constitución da Corporación Municipal, unha vez proclamado Alcalde ou Alcaldesa, correspondéndolle esa honra á persoa que presida a mesa de idade. Como na data da Constitución da Corporación Municipal o Reglamento de Honras e distincións do Concello de Monforte non estaba aprobado, e non se puido realizar, ao non haber mesa de idade na data de onte, a Medalla de Alcalde foille imposta a José Tomé Roca, Alcalde de Monforte de Lemos, pola Secretaria Accidental Mª Luisa Quiroga Dapena.
Unha vez realizada a imposición da Medalla a José Tomé, o Alcalde procedeu, tal e como establece o artigo 24 do Regulamento, á imposición da Medalla de Concelleiro ou Concelleira ao resto de membros da Corporación Municipal que a ostentarán como atributo da representación do seu cargo e que é idéntica á do Alcalde, pero no anverso, orlando ao pé coa inscrición de Concelleiro ou Concelleira.
A Medalla unicamente a ostentará o titular da mesma, mentres ocupe dito cargo, podendo utilizala coincidindo coa celebración de actos institucionais, solemnes ou outras ocasións e acontecementos oficiais e así se consideren en virtude da representación que ostentan.
O Alcalde tamén lles entregou aos membros da Corporación Municipal a Insignia do Concello de Monforte de Lemos que é unha reprodución en miniatura do escudo oficial do Concello.
