Segundo os populares, a estas alturas do verán faltan vías por acondicionar, “en Muras e Folgoso do Courel -ambos coa maior parte das estradas sen desbrozar-; Castro de Rei, Friol ou Riotorto onde estes traballos aínda están, aproximadamente, ao 50%; ou en Trabada -coas marxes da LU-P-6102 aínda por desbrozar”.
Ameijide fai fincapé na necesidade de desbrozar as marxes das estradas da Deputación que son “as principais vías de comunicación entre os distintos núcleos de poboación” e que polo verán rexistran un maior tráfico; xa sexa polas tarefas do campo propias desta época e que supoñen un volume importante de desprazamentos con maquinaria agrícola ou pola chegada de visitantes á nosa provincia”.
Do contrario, “a vexetación e maleza invade non só as cunetas, senón incluso parte da calzada diminuíndo o espazo para a circulación dos vehículos e dificultando a visibilidade dos condutores e usuarios”. Hai que ter en conta que hai casos de vías provinciais co asfalto en mal estado, cun trazado estreito e moitas curvas ou que discorren por lugares onde a néboa é habitual e, polo tanto, as condicións son cada vez máis adversas.
