A moción recolle datos estremecedores: máis de 56.000 persoas palestinas asasinadas, entre elas 18.000 nenas e nenos, segundo Nacións Unidas e organizacións humanitarias. Amais, denuncia o asedio total a Gaza, a destrución de hospitais, escolas e infraestruturas básicas, así como a fame imposta a toda a poboación.
«Non podemos aceptar que a Unión Europa e o Reino de España sigan caladas, fornecendo armas e mantendo acordos comerciais con Israel em canto se comete unha barbarie comparábel aos episodios máis negros da historia recente», afirma o grupo municipal.
Entre os acordos que se propoñen ao Pleno están:
- Condenar o xenocidio en Gaza e o apartheid en Cisxordania.
- Declarar a Benjamin Netanyahu persoa non grata.
- Instar ao Goberno español a liderar na UE un embargo comercial total a Israel, incluíndo a compra e venda de armamento, e impulsar sancións conforme á Carta das Nacións Unidas.
- Retirar a bandeira da Unión Europea do balcón e das dependencias municipais en tanto a Comisión Europea non condene con rotundidade o xenocidio e suspenda o Acordo de Asociación con Israel.
PC-IGV lembra que “a Galiza é un pobo solidario, con longa experiencia migratoria e de exilio, e que non pode permanecer indiferente. Chantada debe alzar a súa voz contra a barbarie e a prol dos dereitos humanos. Quen cala ou xustifica é cómplice”, conclúe a formación
