Os populare4s aseguran que o alcalde de Ribas de Sil leva medio ano sen convocar os plenos ordinarios incumprindo o acordo do inicio de mandato que establecía a súa celebración cunha periodicidade de dous meses.

“Ante este incumprimento reiterado co que se vulnera o dereito fundamental dos cidadáns de participar nos asuntos públicos e se reduce o dereito dos concelleiros de exercer plenamente as súas funcións representativas”, o Grupo Municipal Popular presenta formalmente unha queixa ante a Valedora do Pobo.

O incumprimento da periodicidade plenaria acordada, o primeiro luns de cada mez impar, atenta contra o dereito fundamental recoñecido no artigo 23 da Constitución Española que recolle: “Os cidadáns teñen dereito a participar nos asuntos públicos, directamente ou por medio de representantes, libremente elixidos en eleccións periódicas por sufraxio universal”.

Engaden que o rexedor socialista -que é o encargado de convocar as sesións plenarias- “está a vulnerar o principio de representación democrática ao impedir que os concelleiros da oposición exerzamos o noso labor de control ao goberno”.

A portavoz popular agarda que a Valedora do Pobo admita a trámite a queixa e que requira ao Concello o cumprimento inmediato do acordo plenario sobre a periodicidade dos plenos ordinarios; ademais de emitir as recomendacións necesarias e supervisar o cumprimento das medidas adoptadas.