O BNG de Pantón pide ao Concello que se dirixa ás distribuidoras eléctricas e que informe á veciñanza cales son as causas dos cortes de luz que afectan a varias parroquias. Reclama transparencia sobre a situación, e lembra os perxuízos que provoca na veciñanza e no tecido económico.

A portavoz municipal, Rosana Prieto, asegura que na súa casa “esta situación déixanos sen auga, sen luz, con perdas de alimentos e obríganos a desprazar para termos teléfono e internet, xa que todo leva corrente. Tememos que chegue o frío porque ata os pellets van concectados á electricidade”.

Os nacionalistas quéixanse do abandono por parte das distribuidoras, nun concello con encoros, “Veñen, privatizan os ríos, asolagan aldeas e temos o peor e máis perigoso dos subministros”. Pide explicación nos parlamentos galego e español, e solicitan que o concello de Pantón faga de valedor da veciñanza, “esta situación é perigosa, ten custos económicos para a veciñanza e dura demasiado tempo”.

As molestias, apunta o BNG, afectan a fogares e negocios de todo tipo. “A veciñanza debe saber o que está a pasar, para poder previr fontes de enerxía alternativas e organizar a súa vida diaria e a súa actividade económica», conclúe, Rosana Prieto.