Tras coñecerse que o Sergas adxudicara estes días a construción do centro médico, Celestino Rodríguez lamentou que “o PP no Concello e a Xunta de Galicia non tivera en conta a opinión da maioría de veciños que prefiren renovar as instalacións do actual ambulatorio”.

Rodríguez explicou que actualmente o terreo onde o Partido Popular prevé situar o novo Centro de Saúde en Escairón, o coñecido Campo da Lama, está destinado a usos deportivos e de lecer, polo que a construción do inmoble obrigaría a reducir o parque saudable e o platanar da contorna, “rompendo o urbanismo de Escairón e un dos centros de esparexemento e lecer dos veciños”.

Os socialistas do Saviñao ven tamén como inconvenientes que o emprazamento escollido pode dar problemas de ‘encharcamentos’, porque é o lugar onde nace o río Pesqueiras e fórmanse lagoas de auga nos meses de inverno, a proximidade do colexio que ocasionará problemas de aparcamento e a distancia das farmacias.

Segundo afirma o voceiro socialista, presentaron varias iniciativas no Pleno do Concello, rexeitadas polo PP e o BNG, propoñendo a rehabilitación do Centro de Saúde actual entendendo que é mellor solución que investir nun novo, solución esta que ademais non conta co apoio de moitos/as veciños e veciñas.

De non ser posible realizar os traballos de acondicionamento referidos, os socialistas sinalan como alternativa enclaves mellores para situar o novo centro médico como poderían ser o edificio de sindicatos ou a finca do “Larsa”, esta última propiedade de Suplusa.