A Consellería de Política social decretou o peche cautelar inmediato da escola infantil San Vicente de Paúl, situada en Monforte de Lemos xestionada por unha entidade privada.

Fontes do departamento autonómico confirmaron a Europa Press a decisión, que se produciu tras a inspección que levou a cabo por mor da denuncia rexistrada pola familia dun dos menores matriculados.

A proposta de peche tras a inspección –que sempre se efectúa cando se produce unha denuncia– débese a graves deficiencias nas instalacións do centro, algunhas de tipo estrutural.

Ata agora un total de seis nenos de entre 2 e 3 anos eran usuarios do centro. As familias foron notificadas do peche, que ten un carácter inmediato e indefinido, e os nenos afectados serán recolocados nas outras dúas gardarías que funcionan en Monforte, unha municipal de xestión privada e outra privada.