O Concello de Monforte intégrase no Programa Viogen e a Policía Local vai colaborar coa Policía Nacional na xestión deste problema. No sistema de Seguemento Integral (VIOGEN), a Policía Nacional realiza seguemento de 30 casos activos de mulleres con domicilio en Monforte de Lemos, 4 deles están considerados de risco medio, 13 de risco baixo e 13 de risco non apreciado. O número de denuncias por malos tratos presentadas en Monforte no primeiro trimestre deste ano é de 6 e no mes de abril rexistráronse 2. No 2018 foran 38 denuncias.
Na reunión da Xunta Local de Seguridade tamén se deu conta dos trámites do Concello para trasladar o servizo de drogodependencias do edificio de sanidade. O obxectivo é aprobar en pleno a cesión ao Ministerio do Interior de dito edificio con destino a albergar a nova comisaría.
O alcalde tamén solicitou á Subdelegada e ao Comisario Provincial que se traten de cubrir as vacantes que existen na Comisaría Nacional de Policía. Mentres o Concello ten en período de formación a 3 novos axentes da Policía Local na Academia Galega de Seguridade Pública de A Estrada e iniciouse o expediente para o concurso de traslado das novas vacantes. En poucos meses serán 5 os novos policías locais que se incorporen á Policía Local de Monforte. O Concello tamén contratará 6 policías auxiliares durante 6 meses, que prestarán o seu servizo entre maio e decembro.
