O Centro Cívico de Monforte de Lemos acollerá un interesante obradoiro sobre a crianza nos primeiros anos que incidirá na importancia de dirixir o foco da educación ás familias e ás escolas para evitar a sobrecarga emocional dos nenos e nenas. O obxectivo é autoeducarse para educar.
No que respecta aos contidos da formación, os asistentes coñecerán e aprenderán a comprender que significa para unha nena e un neno pequeno nacer e atopar un mundo novo ao seu arredor. Todo ese universo de novidades e de emocións vai incidir nos cativos e cativas nos seus primeiros anos de xeito inconsciente. Neste sentido, a conciencia e a auto-conciencia dos adultos/as que acollen e coidan será máis transcendente do que nos podemos imaxinar.
Guiar, coidar, protexer, son accións que por lóxicas non deixan de ser importantísimas para o integral e san desenvolvemento das criaturas. Abordaranse os medos e desexos que se dan xa na xestación, a idade e a etapa vital na que se atopan os pais e as nais e tamén os roles destes nos primeiros anos dos pequenos. Coñeceranse e desenvolveranse conceptos como a autoridade, o autoritarismo, o apego, os límite, os ritmos e os ambientes.
Este obradoiro está especialmente indicado para familias, profesores, educadores, técnicos de xardín de infancia, estudantes e todos/as aqueles que queiran mellorar o vínculo cos nenos e nenas cos que compartan a infancia.
A formadora será Consuelo Balaguer Ibáñez, educadora social e terapeuta formada na Universitat de Barcelona. É especialista en Desenvolvemenro Persoal no ámbito familiar e escolar, presidenta da Asociación Vent de Llevant en Castellón, co-fundadora do Centro de Educación Socio-Emocional Miscelánea, creadora de Programas de Educación Socio-Emocional en centros educativos e unha das persoas que colaborou na elaboración da Lei da Infancia na Comunidade Valenciana.
O taller desenvolverase, pois, o sábado 8 de xuño no Centro Cívico de Monforte de Lemos con horariode 9:30 a 13:30 h. pola mañá e de 15:30 a 19:00 h. pola tarde. A organización corre a cargo de Miscelánea, Espai de Creixement Conscient coa colaboración do Concello de Monforte de Lemos.
Para informarse de posibles prazas libres para inscrición contactar no correo electrónico autoeducarseparaeducar@gmail.com e nos teléfonos 636322254 / 637586267
