O pasado mes de xuño celebrouse a XXXI Edición da Cata dos Viños de Galicia, organizada pola Consellería do Medio Rural e os Consellos Reguladoras das Denominacións de Oribe Ribeiro, Valdeorras, Rías Baixas, Monterrei e Ribeira Sacra. Ás oito da tarde do xoves día 11 entregáronselles os premios correspondentes aos mellores viños deste certame.
Dentro da Denominación de Orixe Ribeira Sacra foron tres os viños premiados. O Acio de Ouro ao mellor tinto da D.O. Ribeira Sacra foi para Casa Moreiras, de Casa Moreiras S.L. (Pantón). Pola súa parte, o Acio de Ouro en Viños Ecolóxicos foi para Abadía da Cova, de Adegas Moure S.A. (O Saviñao). Finalmente, o Acio de Ouro Tinto en Viños de elaboracións con madeira foi para Adega Vella Barrica, de Jorge Feijóo González (A Teixeira, Ourense).
Ademais, estes días a D.O. Ribeira Sacra está a participar no Mondial des Vins Extremes, celebrado no italiano Val d’Aosta. A este certame a D.O. presenta 51 mostras de 35 adegas, 44 de viños tintos e 7 de brancos. Trátase dun evento moi exclusivo, xa que só poden participar territorios de viticultura heroica, é dicir, aqueles nos que as condicións orográficas non permiten a mecanización, as condicións climáticas son adversas, os viñedos atópanse en zonas xeográficas dun alto valor paisaxístico e están distribuidos en terrazas. En España as únicas denominacións participantes son Canarias, Priorat e Ribeira Sacra.
