Para dinamizar o comercio local calquera opción atractiva que repercuta nas vendas vai ser sempre benvida polos comerciantes. E así pasou o pasado ano, cando a directiva do CCU apostou por traer algo grande, algo que chamase a atención e tivese ese toque de ‘espectacularidade’ que tanto lle gusta aos monfortinos e ás monfortinas.

A aposta foi traer unha megatirolina que atravesaba, no seu percorrido, a explanada da Compañía a varios metros de altura sobre o chan. Os seus cartos custaría pero quedou claro que espertou a curiosidade e o interese por vivir emocións fortes e a experiencia de sobrevoar un dos lugares máis emblemáticos de Monforte.

Todo un éxito e un tanto que se marcou a xerencia do CCU de Monforte pois notouse nas vendas dos días que durou a campaña e os participantes na atracción tamén gozaron e quedaron con ganas de máis.

Con estes antecedentes non era de estrañar que a tirolina volvese á cidade do Cabe para goce dos que quedaron con ganas de repetir e para aproveitar o tirón comercial que provoca no consumo dos establecementos locais.

Esta atracción e dúas complementarias -rocódromo e circuíto multiaventura- estarán preparadas para os máis aventureiros/as entre os días 25 de xullo e 3 de agosto. As entradas só se poderán conseguir facendo unha compra mínima de 10 euros nalgún dos máis de 150 comercios asociados ao Centro Comercial Urbano de Monforte.

Cada entrada dá acceso de balde a unha soa actividade, tirolina, rocódromo ou circuíto multiaventura e o horario para acceder é de 10:00 a 13:00 polas mañás e de 19:00 a 24:00 h. polas tardes-noites.