O Concello de Monforte celebra as súas Festas Patronais na honra da Virxe de Montserrat, entre o 11 e o 16 de agosto. A cantante do Incio, Lucía Pérez, abre este domingo as festas coa lectura do pregón, ás 20.30, diante da Casa do Concello.
Este ano as festas contan con duas iniciativas sociais e inclusivas. Por unha banda, o Concello de Monforte chegou a un acordo cos responsables das atraccións mecánicas das Festas, para que durante os días 12, 13 e 14 de agosto, durante unha hora, de 18:00 a 19:00 horas, a música deixe de soar en solidariedade con nenos e nenas autistas ou con enfermidades raras. Así estes nenos e nenas poderán, nese espazo de tempo, gozar das atraccións de forma tranquila e sosegada.
Esta foi unha iniciativa conxunta do Concello de Monforte e a Asociación de Autismo, que valoraron desde o primeiro momento esta iniciativa como moi necesaria, para facer das Festas Patronais unhas festas inclusivas e das realmente poidan gozar todos.
Tamén durante as festas, o Concello de Monforte contartá cun Punto Violeta; unha carpa informativa, de atención e concienciación contra as agresións sexistas que estará atendida por persoal especializado e se ubicará na rúa Cardenal. A Concellería de Muller e Igualdade, a través do Centro de Información á Muller, asinouse un convenio de colaboración coa Cruz Vermella de Lugo para contar con este “Punto Violeta”. Esta campaña está financiada con cargo ós Fondos da Secretaría Xeral de Igualdade en desenvolvemento do Pacto de Estado contra a violencia de xénero.
En verbas do Alcalde de Monforte, José Tomé Roca, “as violencias sexistas teñen moitas formas, ámbitos e espazos nos que se producen. Debemos concienciar e sensibilizar para modificar e erradicar actitudes e comportamentos sexistas nos espazos de lecer, creando así espazos libres de agresións, onde todos e todas poidamos desfrutar das festas libremente e con tranquilidade”.
