O Equipo de Goberno do Concello de Monforte conmemorou o pasado venres o Día Europeo da Cultura Xudía cun acto celebrado na rúa Falagueira, a carón do nº 9.
O acto estivo presidido polo Alcalde da cidade, José Tomé Roca, que estivo acompañado pola 1ª Tenente de Alcalde, Gloria Prada, varios concelleiros/as e diversos membros descendentes de familias xudías, como a Gaibor e o historiador Felipe Aira.
Procedeuse á plantación dunha oliveira e ao descubrimento dun monolito cunha placa conmemorativa así como tamén á lectura dun texto homenaxe do autor sefardí Mois Benarroch. A Tenente de Alcalde, Gloria Prada, foi a encargada da devandita lectura.
A continuación tivo lugar unha breve actuación dun cuarteto de corda e vento que interpretou dúas pezas baixo a dirección de Fernando Sanmartino, director do Conservatorio de Monforte.
Segundo o alcalde, o obxectivo deste evento conmemorativo “é homenaxear e lembrar á Comunidade Xudía e Xudeu Conversa monfortina que, ao longo dos séculos, coas súas vivencias e co seu traballo, contribuíron á construción e á existencia de Monforte de Lemos”.
Monforte, pertence á Rede de Xuderías de España. En Galicia, tamén están integradas nesta rede as cidades de Ribadavia e recentemente Tui.
