O Concello de Sarria ofrece un amplo abano de actividades culturais, educacionais e deportivas para nenos/as e para adultos/as. Para anotar os máis pequenos/as en obradoiros educativos e nas escolas deportivas o prazo para anotarse empezou xa a pasada semana mentres que para os obradoiros de cultura e as actividades deportivas para os adultos/as o prazo de preinscrición comeza o vindeiro día 20 de setembro.
Entre as actividades deportivas para os cativos pódense escoller as seguintes: patinaxe e hóckey, defensa persoal, tiro con arco, ximnasia rítmica, fútbol, baloncesto, fútbol sala, tenis, rugby ou taekwondo. No que respecta ás educativas e culturais destaca a danza e música tradicional, inglés, teatro ou un interesante obradoiro de conta contos. Cómpre dicir que moitas das actividades ofrécense grazas a asociacións culturais e deportivas de Sarria.
Para os maiores a oferta deportiva pasa por actividades como o ioga, a danza terapia, bailes de salón, pilates, zumba e ximnasia de mantemento. Para as culturais pódese escoller entre alternativas como corte e confección, bordado, teatro, coral, clube de lectura, música e baile tradicional, inglés ou introdución á historia e literatura galega.
Pódese acceder ao programa completo de actividades a través da web do concello.
No Concello de Pantón este 16 de setembro comeza o prazo para apuntarse nos denominados “Luns activos para público infantil” nos que se ofrecerán actividades para os nenos e nenas con idades comprendidas entre os 3 e os 12 anos. O lugar das actividades será o 2º andar do Edificio Sociocultural e realizaranse todos os luns entre as 16:00 e as 18:00 h.
Neste mesmo concello e pensando nos maiores tamén haberá “Luns activos” con diferentes actividades a realizar cada luns entre as 18:00 e as 19:30 h. tamén no 2º andar do Edificio Sociocultural. Neste caso, o prazo para inscribirse comeza o día 30 de setembro; o lugar para facelo, na Casa do Concello en horario de mañá.
E nesta liña, o Concello de Bóveda tamén abriu o prazo para anotarse en diferentes actividades para maiores e para pequenos/as. A oferta para público adulto céntrase en cursos para poñerse ao día nas novas tecnoloxías, obradoiros de memoria, pandeireta, coral, zumba e ximnasia de mantemento. Para os cativos/as patinaxe, breakdance, música e danza galega. Os venres, e para todos os públicos, haberá Cine na Biblioteca ás 19:00 h.
As inscricións realizaranse na casa do Concello entre as 10:00 e as 13.30 h.
