Os usuarios do viñobús, para esta campaña, foron 235 persoas en grupos de 15-18. Eran maioritariamente galegos, en boa parte de Pontevedra e A Coruña, tamén Asturias e León. Viaxan en familia ou grupos de amigos e pasan a fin de semana en establecemento de turismo rural ou vivenda de aluguer completo.
A actividade enoturística do Viñobús na súa edición de vendima basésase na experiencia de converter aos participantes en viticultores por un día. Os visitantes coñecen as diversas tipoloxías de vides e uva, as características do seu cultivo, recollen a uva, písana na adega como se facía antigamente, miden a graduación do mosto, degustan diversos tipo de mosto, … Rematan a xornada cun xantar composto das viandas típicas da vendima e, todos aqueles que pisaron o viño, recibirán nos seus domicilios unha botella para degustar os caldos dos que, en parte, foron creadores. As prazas esgotáronse en cuestión de días, e como adoita ser habitual, quedou unha longa lista de agarda.
En canto ao primeiro curso para o desenvolvemento de “Baños de Bosque” como produto turístico, que ven de desenvolver o Consorcio de Turismo da Ribeira Sacra esta fin semana e para o que se habilitaban 20 prazas, esgotou as prazas en menos dunha semana.
O encargado de impartir o curso foi o especialista na materia Edgar Tarrés co que tamén colabora o Consorcio para a presentación na Universidade de Vigo dun proxecto de posgrao vencellado ao turismo de benestar. No curso desenvolto na Ribeira Sacra sobre “Mindfulness” e “Turismo de Benestar” afondouse na adaptación deste territorio como destino potencial para especializarse en mercados turísticos non masificados, moi respectuosos co medio e altamente desestacionalizados.
