Sober recibía este venres a visita dos participantes nas Xornadas sobre Desenvolvemento Rural e Turismo ‘De camiño ao mundo rural’ organizadas pola Xunta de Galicia en Santiago entre o 5 e o 8 de novembro.

As 120 persoas participantes foron recibidas polo alcalde, Luis Fernández Guitián, e tiveron saída ao campo, visita ao centro oleiro de Gundivós e ao proxecto de mobilidiade de terras de Proendos. Aproveitaron ademais para gozar da gastronomía local cun xantar na Cantina de Doade e pola tarde visitarán a bodega Regina Viarum.

O obxectivo das xornadas é desenvolver unha estratexia global para previr e combater o abandono das zonas rurais e reavivar as súas economías a través dun enfoque holístico incluíndo a agricultura, o turismo e o desenvolvemento rural no seu sentido máis amplo.