Entre os asuntos de urxencia a tratar, comúns a todo o interior galego, poranse en común propostas sobre políticas para a Ribeira Sacra e a Reserva da Biosfera Courel-Iribio-Ribeira Sacra, co obxectivo de que revertan no benestar da cidadanía e nun apoio real ao patrimonio e ao medio natural.
Analizarán tamén o aumento dos valores catastrais no medio rural e o incremento de cargas sobre as persoas que viven neste territorio, así como as condicións do Servizo de Axuda no Fogar e xestión dos servizos públicos.
Anuncian tamén que estudarán medidas e propostas para o estado de emerxencia climática e como contribuír a que reverta no territorio. “É necesario desenvolver o territorio e que se atenda ao que este realmente xera e non unicamente a criterios poboacionais”, aseguran.
Por un interior galego vivo amosa a súa preocupación polo que cosideran ataque do Goberno Galego aos hospitais comarcais e manifestan o seu apoio ao persoal e cidadanía “que defende a restitución da unidade de partos do Hospital de Verín, así como a necesidade de que tanto Verín como Monforte, o Barco e A Mariña volvan ser áreas sanitarias con capacidade de xestión e/ou volvan ter máis autonomía”.
Están convocadas á xuntanza persoas das candidaturas asinantes do manifesto, (Por Chantada, Agroma Sober, C@urel Vivo, Esperta Monforte, Son de Manzaneda, Son de Trives, Son de Pereixo de Aguiar, Xuntos por Chandrexa, Xuntos por Laza, Alternativa Veciñal Antas de Ulla, Agrupación Electores San Xoán de Río), pero está aberta a colectivos e xentes destes territorios do interior galego que se queiran sumar á “defensa da vida digna nas comarcas do interior”. Posteriormente, haberá un xantar para o que cómpre anotarse antes do 18 de decembro (cupchantada@gmail.com).
