As rutas fluviais en catamarán na Ribeira Sacra comezarán a funcionar o día 4 de abril, o sábado anterior á Semana Santa. As persoas interesadas en gozar das rutas polo río Miño ou polo Canón do Sil nesta tempada de 2020 poderán facer a súa reserva a través da Central de Reservas, na que poderán gardar ou comprar billetes, así como solicitar todo tipo de información.
Pódese facer online as 24 horas en reservas.rutasembalses.es; ou ben de luns a venres, de 09:00 a 14:30 horas, no teléfono 982.260.196 e no email catamaranes.turismo@deputacionlugo.org. No Pazo de San Marcos, onde se atopa o departamento de Turismo, profesionais da Deputación tamén atenden persoalmente a todos e todas os interesados.
Desde a Deputación lembran que o número de viaxeiros nas rutas fluviais continúa medrando. Na tempada de 2019 subiu un 5%, co que o número total ascendeu a preto de 62.000 persoas.
