Desde o Partido Popular de Lugo aseguran que a perda de poboación, que chega practicamente á despoboación nalgunhas áreas da provincia, constitúe un motivo de grave preocupación, á vez que un estímulo para buscar solucións ao problema.

O PP de Lugo ultima unha serie de iniciativas coas que espera conseguir un vademecum que poida ser útil desde a perspectiva provincial e aplicable desde a administración local lucense. En febreiro, o PP de Lugo dará comezo aos venres de estudo e debate sobre o reto demográfico. Búscase a implicación de todos os sectores sociais que poden aportar algo para encontrar solucións eficaces para reverter unha situación cada día máis estendida.

Como eixo principal das iniciativas a desenvolver prográmanse accións mensuais para analizar o reto demográfico e como reverter a actual situación no mundo rural, que incluirán a exposición de ponencias por parte de reputados especialistas no mundo da política, da Universidade, do emprendemento, etcétera.

Haberá unha sesión mensual, preferentemente o primeiro venres de cada mes a partir de febreiro. Estas xornadas lucenses de demografía pretenden ser o pistoletazo de saída para mobilizar ao conxunto da sociedade da provincia e visualizar que hai solucións e alternativas viables.

Segundo o PP, a entrada en vigor da Lei de Impulso Demográfico marcará un antes e un despois na abordaxe do problema, no que en Galicia se traballa con rigor desde hai xa moitos anos. Neste senso lembran a aprobación polo Parlamento galego, en abril de 2013, do primeiro Plan de Dinamización Demográfica de Galicia 2013-2016, horizonte 2020, que situou a cuestión demográfica entre as máximas prioridades do Goberno autonómico.