A Asociación cultural, educativa e Social aulABERTA creada por persoas relacionadas co mundo do ensino e con inquedanzas nos ámbitos cultural, educativo e social da comarca de Lemos asegura que “Educar nestes días non é tarefa doada. Nais, pais e educadores/as vivimos nunha sociedade cargada de urxencias e responsabilidades que apenas deixa tempo para pensar. A globalización de Internet e as redes sociais, unido aos tradicionais problemas vinculados ao consumo de alcohol e substancias (nos que os adolescentes se inician cada vez máis cedo), fai que o labor de educar sexa cada vez máis complicado.”

Segundo esta asociación, ao problema do botellón únense agora os problemas derivados do uso dos smartphones, Internet, as redes sociais e as TIC. O risco de adicción á Rede, prácticas como o sexting e a sextorsión, o uso de videoxogos violentos, as apostas en liña, ou o contacto con descoñecidos, xunto ao aumento preocupante do ciberacoso, levan aos expertos a cuestionar se non se estará dando un paso atrás no eido educativo.

A investigación advirte da necesidade de estratexias de intervención de carácter integral. Nese senso, a Prevención e a Educación son dúas das ferramentas máis valiosas para poder dar unha resposta eficaz aos problemas actuais. Neste caso o profesor da USC, Antonio Rial Boubeta, Doutor en Psicoloxía Social, tentará poñer enriba da mesa algúns dos retos educativos  na era dixital e, ao mesmo tempo, algunhas recomendacións para a ser quen de xerar boas solucións, tanto dende as familias como dos propios centros.