A moción aprobouse cunha emenda do grupo socialista, para incluír a eficiencia enerxética nos edificios públicos e de nova construción, e foi apoiada polos 13 concelleiros da Corporación.
Chantada declarou a emerxencia climática e agora tocaría desenvolver un programa de estradas de cobertas vexetais (ECV), para o que cómpre un Protocolo local de fomento e conservación das estradas municipais con coberta vexetal (PEMCOVE).
Ademais, o texto aprobado, exixe que o CO2 secuestrado nunha comarca natural debe enlotarse apenas nesa comarca favorecendo o seu desenvolvemento. Así, é necesario desenvolver no 2020 un censo das toneladas de carbono fixadas no territorio, cando menos aquelas que son públicas ou pertencen a CMVMC, como ponderación para determinar a importancia estratéxica e económica do Concello de Chantada no horizonte da descarbonización e para reforzo do tecido empresarial.
Por Chantada agarda que se sumen á iniciativa, os concellos de Carballedo e Taboada, para avanzar conxuntamente como comarca pioneira na descarbonización e trasladar o acordo a outras institucións para que estuden e impulsen solucións análogas.
