A climatoloxía parace que vai acompañar nesta 38 edición da Feira do Viño de Chantada, e en todo caso, a Feira desenvólvese baixo unha gran carpa, na súa ubicación habitual, no centro da vila. O feito de ter ampliado a Feira á xornada do venres fai que, cada ano, este primeiro día conte con máis xente; e a tendencia é que os domingos a Feira se vaia pechando antes.
A organización asegura que oferta o que demanda a xente, así que o tipo de propostas mantense. Este sábado pola tarde, de 17:00 a 19:00 celebrarase no recito feiral a V Cata Popular. Como novidade, este ano, celébrase o 1º Túnel do Viño, aberto a todos os interesados a un prezo de 10 euros. Nel poderanse catar viños da subzona de Chantada, o horario será de 11:30 a 14:00 h. e dende as 18:00 ata as 20:30 h, tanto o sábado como o domingo, no Auditorio de Chantada.
O pregoeiro desta 38 edición da ‘Feira do Viño de Chantada‘ será Ricardo González Fernández, empresario venezolano nos campos do entretemento e o deporte con raíces familiares na aldea chantadina da Lagariza (Santa María de Nogueira de Miño). A lectura do pregón serás ás 13.00 h., trala actuación da formación tradicional local, Searas.
Como en edicións anteriores, non faltará a música de rúa e as orquestras ao final de cada xornada. Esta fin de semana están representados en Chantada todos os sectores produtivos e coincidindo coa Feira celébrase a XII Feira de Oportunidades e a XI Mostra de produtos e artesanía. A carpa que acollerá estes dous eventos estará na Avenida de Monforte.
As cativas e cativos, maiores de 3 anos, terán tamén o seu espazo na Feira, na Casa da Música de Chantada. A empresa, Velaísca, farase cargo deles con actividades de entretemento, sábado e domingo de 12:00 a 14:00 e de 16:00 a 20:00 h.
Coincidindo o domingo da ‘Feira do Viño’ co Día da Muller, lerase na praza do Cantón, un manifesto ás 12.00 e posteriormente actuará o grupo local, de música tradicional, maioritariamente feminino, Searas.
