Nesta edición da Feira do Viño de Quiroga uniranse, por primeira vez; adegueiros artesanais, como foi ata o de agora, con adegueiros industriais da subzona Quiroga – Bibei. Estase á espera de saber o número de colleiteiros interesados en participar nesta edición.

Fixouse a data do 28 de marzo como o día no que os membros da Confraría do Viño de Quiroga realicen a cata dos viños participantes, viños que uns días antes entregarán as mostras para o seu envío a un laboratorio onde serán analizados.

Outra das novidades serán os cataviños da Denominación de Orixe Ribeira Sacra, que servirán para todas as casetas. Para facilitar a súa limpeza colocaranse na rúa, billas para poder lavalos cando se precise. Entre as actividades que preceden á Feira do Viño, Quiroga ofrece a semana do Quiroga de Tapas, do 2 ao 10 de abril, ou a Carreira Popular que se desenvolverá o Venres Santo.