Un veciño de Telleiros, Héctor Suárez, vén de ofrecerlle ao Concello de Sober a doazón de 20 máscaras de protección que o Goberno local destinará ás auxiliares do Servizo de Axuda no Fogar (SAF) e ao persoal de Protección Civil que estes días fai o reparto de produtos básicos a veciños e veciñas. Héctor dispón de dúas impresoras en 3D que normalmente emprega para fabricar pezas para drons e que agora, unha vez decretada a alerta sanitaria e a situación de emerxencia, decidiu destinar a fabricar máscaras de protección autorizadas por Sanidade para protexerse do coronavirus.Héctor Suárez explica que as dúas primeiras pezas serán para os seus familiares que traballan na rama sanitaria e as 20 seguintes para o Concello de Sober.

Tras esta primeira remesa pensa seguir imprimindo máis máscaras para os hospitais ou sanitarios que as precisen.“É un novo xesto que, ao igual que o da empresa Pulviplass Ibérica cedendo as sulfatadoras, demostra o solidarios que somos en Sober e que todo o mundo está a arrimar o ombreiro”, precisa o rexedor, Luis Fernández Guitián. E como estes casos hai moitos, particulares, empresas, autónomos,… Hai solidariedade e colaboración. Hai responsabilidade.

Unha das cousas boas da aparición do COVID19 é o papel que cada un de nós xoga individualmente para o control da epidemia. A responsabilidade de cada un de nós, repercute a nivel global, e por suposto, cercano. Todos coincidimos na transcendencia que ten o que estamos vivindo. E nestes momentos a xente aporta, colabora, implícase, como vén de facer tamén o IES A Pinguela de Monforte coas súas máscaras de protección 3D.