O alcalde do Saviñao, Carlos Armesto, subliña que “tres destes equipos instalaranse nas oficinas municipais para que todas as plantas da Casa do Concello estean purificadas e desinfectadas”.  Co mesmo obxectivo, proporcionaranse outros dous para o centro de saúde e outros tantos para a residencia de maiores.

O equipo purificador e desinfectante restante instalarase na gardería municipal que o goberno local intentará volver a abrir a partir do vindeiro día 26 para facilitar a conciliación laboral e familiar dos pais e nais que teñan que reincorporarse ao traballo “tendo en conta todas as indicacións que establezan as autoridades sanitarias”.

Armesto defende que se trata “dun servizo interesante que permitirá que todos os edificios públicos do noso municipio conten coa maior garantía fronte ao risco de contaxio tanto para os traballadores coma os seus usuarios”.

Desinfección por ozono

O goberno local tamén acordou a compra dun equipo de desinfección por ozono para acometer labores de desinfección dos vehículos do parque municipal e tamén daqueles que se dedican ao transporte público. “Facilitáraselles aos taxistas ou responsables do reparto de alimentación, carnicerías ou panaderías interesados no servizo”, explica o rexedor local.

Este servizo instalarase no mercado gandeiro e os interesados deberán solicitar quenda contactando co Concello que será o responsable de organizar quendas de media hora para efectuar a desinfección de cada vehículo.

Carlos Armesto engade que “tamén pensamos en prestar este servizo de desinfección por ozono aos negocios e establecementos abertos ao público”. Nese caso, “o servizo de desinfección poderá prestarse os sábados e domingos ou durante a semana no horario no que permanecen pechados os servizos municipais”.