Os campamentos de verán da provincia desenvolveranse en Viveiro, Ribadeo, Portomarín, Palas de Rei, Carballedo, Quiroga e Lugo. En Carballedo e arredores desenvólvense catro campamentos do “Adventure Camp”, e no albergue municipal de Quiroga dous de “Explora o Courel”.

Este martes, 23 de xuño, remata o prazo de solicitudes. A oferta completa pode consultarse no Portal de Xuventude da Xunta de Galicia. O número de prazas nos campamentos é inferior ao de anos anteriores debido á limitación do aforo establecido polas autoridades sanitarias por mor da covid-19, pero amplíase a oferta con novas propostas, que se convocarán proximamente.

Ademais, en colaboración coa Consellería de Cultura e Turismo, poranse en marcha os minicampamentos “Coñece Galicia”, con estadías de cinco días de duración -de luns a venres- en establecementos turísticos; esta modalidade contará con 170 prazas en Lugo. Por último, como en anos anteriores, convocaranse tamén campos de voluntariado, que ofrecerán 60 prazas na provincia.