Alberte Montes, orixinario dos Anguieiros, no concello de Quiroga, estreábase o pasado ano como colaborador do programa “La ventana” e o seu director e presentador para o formato estival, Roberto Sánchez, quixo que repetise neste 2020.

O quirogués recuncará un ano máis e participará co seu estilo característico entre as 17 e as 18:00 h. en diferentes días dos meses de xullo e agosto.

Formará parte do equipo de verán dun dos programas de referencia da SER, e farao con seccións de humor como UN ROLLO DE VERANO ou PADRE NUESTRO, esta última na que falará da súa experiencia como pai novel. Mesmo igual se atreve co mítico xénero da radionovela e probablemente seguirá postulándose para encetar festas e verbenas coa súa eterna reivindicación, #AlbertePregonero.

Alberte Montes

Este polifacético artista recoñécese principalmente nas facetas de actor, guionista, director, humorista e presentador.

Como actor ten participado en varias ficcións, as máis recentes foron ‘FARIÑA’, emitida en Antena 3, e recentemente na serie ‘Do dereito e do revés’ na TVG.

Como humorista participou en programas como ‘Los Infiltrados’ e ‘Los lunes al GOL’ da canle temática GOL, en ‘Land Rober’ e ‘Luar’ da TVG e tamén en “La ventana’ da cadena SER, programa ao que volve este verán.