O BNG sostén que as aulas habilitadas deste centro seguen a carecer do illamento necesario, xa que manteñen os ventanais de madeira e os cristais postos cando se construíu o edificio, a finais dos anos setenta. Tampouco cumpre coa lei de accesibilidade, co agravante de que o centro si conta con matrículas de nenos con dificultades de movemento. “As reformas que se fixeron ata agora son só estéticas polo que o edificio non ten as condicións necesarias para que os nenos e nenas teñan clase alí”, argumentou o voceiro nacionalista Efrén Castro.
Ademais, e dado que a Escola Fogar está no mesmo edificio que o colexio público, o edil criticou que “a Xunta non aclare se é seguro que os nenos estean nun lugar que vai estar en obras durante todo o curso”.
O BNG cuestiona o proxecto de reforma do colexio
O voceiro nacionalista tamén se referiu ás obras anunciadas no CEIP Frei Luis de Granada, “cun millón e medio de investimento do cal só 100 mil euros se destinar a solucionar as deficiencias estruturais do edificio”.
“Os expertos que poido consultar o BNG ven con preocupación a opción elexida e poñen en dúbida que vaia solucionar os problemas de seguridade estructural do colexio público”, apuntalado en xaneiro pasado despois de que o profesorado se negara a dar aulas no centro con fendas que viña arrastrando desde 2011.
Efrén Castro lembrou que o proxecto de reforma tamén “preocupa a outros colectivos, por iso houbo un acordo unánime do concello para contratar un experto que o analice antes de ser executado”.
