Sanidade realizará un cribado entre os veciños do Incio para detectar contaxios de coronavirus despois de que o brote vinculado coa residencia de maiores da localidade aumentase en 49 casos, entre usuarios e traballadores do centro xeriátrico.
Así o confirmou o propio alcalde do municipio, Héctor Corujo, que se atopa illado por ter contacto con persoal da residencia. O rexedor trasladou este mércores unha mensaxe de “ánimo e fortaleza” aos traballadores do centro, que “están a desenvolver un traballo tan duro como imprescindible”, así como a “total colaboración” do Concello tanto co centro xeriátrico como coa Consellería de Sanidade.
“Sanidade está a facer un traballo intenso no rastrexo de contactos daquelas persoas que deron positivo para conter de forma urxente outros positivos, posteriormente fará un cribado entre os veciños para coñecer o alcance do brote e articular as medidas que correspondan”, afirmou.
Segundo os datos de Política Social e Sanidade, actualmente hai 113 casos activos de COVID-19 na residencia do Incio, que son 49 máis que os notificados hai 24 horas. Así, o número de usuarios contaxiados disparouse de 56 a 87 e o de traballadores subiu de 8 a 26.
