Distinciones Gallaecia 2020, certame de gran recoñecemento a nivel nacional, tivo lugar este ano no Hotel Bela Fisterra da Costa da Morte o pasado 31 de agosto. Diferentes catadores, sumilleres e técnicos presentes no encontro cataron máis de 600 caldos e só 72 deles foron galardoados.
Un deles foi o “Vía Romana Grandes Añadas 2011”, premiado como un dos mellores viños e destilados. Cun xeito de elaborar, sen présas, foi embotellado a finais do 2012 despois dun ano no que logo de estar en depósito pasou a botella.
A adega chantadina, Vía Romana Adegas e Viñedos, lugar onde se elabora este caldo premiado, foi seleccionada recentemente como “Bodega Ejemplar” na revista especializada Mi Vino, publicación que fixo unha reportaxe moi completa na que se conta a historia do lugar e o proceso de elaboración dos mencía desta zona da Ribeira Sacra.
Segundo afirma Antonio Candelas, director da revista, “este proyecto ha echado a andar y más pronto que tarde lo veremos entre nosotros, pero lo más importante es que marcará el camino de una forma de entender y elaborar la Mencía en la Ribeira Sacra. Una revolución que no hará otra cosa que revalorizar un patrimonio tan bello como singular”.
ENOTURISMO E VENDIMA
Nun ano raro e difícil para o turismo, Alba Vázquez, do Departamento de Márqueting de Vía Romana, explícanos que houbo bastantes visitas á adega, máis das que esperaban dadas as circunstancias.
As medidas sanitarias foron estritas e rigorosas contando en cada quenda de visitas cun máximo de 10 persoas, visitantes que se movían por espazos diferentes aos compartidos por persoal da adega. En canto á oferta enoturística seguiuse atendendo tamén aos grupos de visitas que chegaron polo “Cavino” cada venres, e que facían parada no seu traxecto do Camiño de Santiago.
En relación aos traballos da vendima, Alba coméntanos que a vendima da uva mencía comeza o vindeiro xoves 17 de setembro e a do godello aínda non ten data programada, calculando que a colleita deste ano poida alcanzar os 150.000 quilos. Tamén nos indica que a oferta enoturística quedará bloqueada do 14 de setembro ao 8 de outubro por mor destes traballos.
