Durante unha visita aos viñedos e ás instalacións da adega Rectoral de Amandi, Feijóo subliñou que as cifras deste ano reflicten, de novo, a rendibilidade dun sector que demostra que o rural galego ten futuro e potencial para albergar empresas, con máis de 13.000 viticultores e 450 adegas.
O sector computa unha facturación de 200 millóns ao ano e posúe “unha gran vocación exportadora”, xa que unha de cada cinco botellas do cinco denominacións de orixe saen de Galicia cara a distintos países.
Nesta liña, o presidente aludiu a Rectoral de Amandi como un exemplo da aposta polo rural, pola calidade do produto e por aproveitar todas as facetas do sector, como o turístico, con visitas guiadas para as persoas interesadas en aprender máis sobre o proceso de elaboración do viño e coñecer a paisaxe única onde se enclava esta adega.
Con respecto á vendima no D.O. Ribeira Sacra, resaltou que xa se recolleron 1,3 millóns de quilos de uva, baixo a previsión de chegar ata os 5 millóns de quilos, “cunha calidade sanitaria e grao de maduración de uva cultivada ata agora moi boa”.
APOIO PARA A RECONVERSIÓN DE VIÑEDOS
Ao longo da súa intervención, o responsable do Goberno galego lembrou que o compromiso da Xunta co sector ponse de manifesto tamén nos máis de 7 millóns de euros investidos no período 2019-2020, para a reestruturación e reconversión de viñedos, para a elaboración e comercialización e para a promoción en terceiros países.
“E temos en marcha tamén unha estratexia de dinamización económica, territorial e turística das comarcas vitivinícolas de Galicia”, lembrou, para engadir que se trata dunha actuación conxunta da Administración autonómica cos sectores vitivinícola e do turismo, para “reforzar a dimensión internacional, turística e territorial” do viño galego.
O presidente do Goberno galego concluíu pondo en valor a profesionalidade do sector para afrontar a vendima nas mellores condicións de seguridade posibles ante a covid-19, constatando a realización de probas de cribado a unha alta porcentaxe de temporeros.
