Os “Premios Educa Abanca”, coñecidos como “Los Goya de la Educación”, buscan poñer en valor a figura do bo docente e teñen como característica principal que ningún profesor ten a iniciativa de postularse para ao premio, senon que deben ser os seus alumnos e alumnas quen o propoñan.
A iniciativa naceu no ano 2016 froito da posta en común dunha idea que botaron adiante un grupo de profesores de diferentes etapas educativas, e tendo como obxectivo premiar a docentes que destacan polas súas boas praxis. Establecidas as bases definitivas dos premios fíxose pública a primeira convocatoria no ano 2017.
O monfortino José Pino Vázquez, profesor de informática no IES A Pinguela dende o ano 2008, foi notificado o pasado 30 de setembro de que estaba entre os 10 docentes finalistas na categoría de FP. Para chegar aquí, a plataforma Educa examinou a conciencia o seu curriculum e valorou o seu traballo docente puntuando, entre outros criterios: a realización de actividades innovadoras na aula, a interacción do docente en redes sociais e plataformas, ter un sitio web ou blog propios con fins educativos, a participación en accións formativas de reciclaxe de coñecementos, a publicación de libros e artigos en revistas, a participación en accións solidarias, a organización de xornadas de formación, a investigación ou a dedicación ‘extra’, aquela que vai máis alá do formal e que deixa pegada no alumnado.
Pino destaca en moitos dos criterios comentados segundo se pode deducir da súa coñecida traxectoria no IES A Pinguela. Neste senso cómpre dicir que ten un blog no que se pode ver o seu traballo como docente e os seus proxectos, involúcrase constantemente en accións solidarias e en procesos de investigación, ten publicado libros e artigos, interacciona e motiva moi ben ao alumnado, e dende o 2008 imparte sesións como formador de profesorado a nivel de Galicia.
A puntuación recibida descoñécese -farase pública o 10 de xaneiro- e a clasificación final así como o gañador do premio ao “Mellor docente de España 2020” faranse públicos nunha gala especial durante a celebración do 4º Congreso Mundial de Educación. EDUCA 2021.
