O Concello do Saviñao pon en valor a biblioteca municipal coa reforma integral do teito. Deste xeito, segundo explica o alcalde, Carlos Armesto, contribúese a que este edificio, “que xa é emblemático para o municipio”, sexa “máis cómodo e esteticamente mellor ornamentado”.

Concretamente, a entidade local destina a esta actuación 40.000 euros. Os traballos, que xa están iniciados, consisten no adecentamento total da cuberta. Inclúen a construción dun lucernario na parte alta, substituíndo as uralitas, e as baixantes irán en canal de cinc. Ademais, recuperarase a balconada traseira. Esta é un elemento de madeira que separa a biblioteca do auditorio, polo que, subliña o máximo mandatario municipal, “tamén fará que este edificio sexa máis atractivo”.

A reforma da cuberta e, con elo da biblioteca, enmárcase no obxectivo do goberno local de “actuar en todas as instalación públicas”. “Pouco a pouco iremos facendo obras en todas elas. Neste caso, o que pretendemos é que O Saviñao mellore un edificio que é un referente”, conclúe Armesto.