O Concello de Monforte informa á veciñanza que o vindeiro luns 26 de outubro levarase a cabo un corte no subministro de auga nas rúas Alonso Ríos e Vicente Risco, para facer as correspondentes conexións da acometida á nova tubaxe de fundición. O corte iniciarase ás 9:00 horas coa previsión de que se alongue toda a mañá.

O martes 27 de outubro levarase a cabo outro corte que afectará neste caso ao subministro de auga na rede do Fabeiro, para levar a cabo obras cuxo obxectivo é mellorar a eficiencia hidráulica da rede de abastecemento municipal. O corte durará aproximadamente dende as 9:30 e ata as 16:00 horas, e afectará a todo o Chao do Fabeiro, Baamorto, Moreda, San Xulián de Tor, Pol, Cinsa, Seoane, así como á zona do Mercado Gandeiro ata as rúas Manuel Murguía e Uxío Novoneira.

A actuación consiste na instalación de 3 contadores, cos que se mellorará a sectorización da rede, creando 3 subsectores dotados con sistemas de monitorización para rexistrar caudais e presións.

Toda a información recollida por estes sistemas de monitorización envíase diariamente ao centro de control e visualización da oficina de Aqualia en Monforte. Deste xeito, recibidos os datos e analizados, permiten mellorar o servizo, minimizar perdas, evitar avarías e saber o número de posibles usuarios afectados. Os equipos tamén permiten transmitir alarmas por mensaxes vía móbil, avisando aos operarios de posibles fugas ou roturas.

O Concello agradece a comprensión dos veciños e veciñas diante das molestias que os traballos de mellora poidan ocasionar.