Xunta, concellos e deputacións conforman unha comisión para que a Ribeira Sacra sexa Patrimonio Mundial en 2021. Trátase dunha nova ferramenta que é “clave”, tal e como destaca o Goberno galego, para a “coordinación de actuacións e investimentos” que permitan avanzar “coas máximas garantías” cara á celebración da 45ª sesión do Comité da Unesco do 2021, que decidirá sobre ese recoñecemento.

A Xunta tamén destaca o carácter “transversal” desta comisión que, a través da implicación dun total de sete consellerías, reflicte o seu “compromiso” cos concellos que conforman a paisaxe cultural da Ribeira Sacra, enclave situado entre as provincias de Lugo e Ourense.

Por parte do Goberno galego, están representadas a Vicepresidencia primeira –responsable da área de Turismo–, a Vicepresidencia segunda –área de Economía, Empresa e Innovación–, así como as consellerías de Medio Ambiente, Territorio e Vivenda; Infraestruturas e Mobilidade; Cultura, Educación e Universidade; e Medio Rural.

Esta comisión, asegura a Xunta, suporá “un antes e un despois” para a Ribeira Sacra, posto que permitirá que diferentes organismos e entidades presenten as súas iniciativas “para unha xestión eficaz” tendente a “a conservación dos seus valores como paisaxe cultural”