A Deputación de Lugo e o Concello de Sarria desbloquearon e puxeron fin á tramitación do procedemento administrativo para xustificar as cantidades transferidas no marco do convenio relativo ás obras de construción da piscina cuberta da vila sarriana, asinado en decembro do 2010 e cun importe de 1.862.040,09€.

A vontade e a plena colaboración entre as dúas institucións fixo posible concluír un proceso que permite normalizar unha situación anómala que se viña arrastrando dende hai anos, nos que estivo pendente de aprobar a documentación xustificativa do convenio que permitiu a apertura da piscina de Sarria, unha infraestrutura moi demandada pola veciñanza de toda esta comarca.

Tratouse dun procedemento complexo que sufriu distintas complicacións a nivel administrativo, polo que, tanto o Presidente da Deputación, José Tomé, como o Alcalde de Sarria, Claudio Garrido, amosan a súa satisfacción por desbloquealo e finalizalo con todas as garantías normativas.