O alcalde da Pobra, Xosé Lois Maceda, reuniuse o pasado venres coa educadora familiar Mónica Carballo e a xefa do Departamento de Orientación do Daviña Rey, Nieves Domínguez. O alcalde manifestou o seu agradecemento pola mediación na cesión de recursos que cheguen ao alumnado e  familias desta localidade.

Foron varias as  achegas do instituto monfortino cara ao alumnado da Pobra a través de Servizos Sociais do Concello. Entre estas achegas inclúese material sanitario como máscaras, e tamén, a través da ANPA do Daviña Rei presidida por Jesús Miguel Domínguez, material escolar para familias desfavorecidas.  

Durante a reunión, o alcalde e a educadora coincidiron ca Orientadora na oportunidade que ofrece a colaboración entre institucións locais para fomentar o desenvolvemento rural e fixar aos habitantes máis novos.  

O IES Daviña Rey, ademais de ensinanzas de ESO e Bacharelato, ten unha ampla oferta de ciclos de formación profesional das familias de Sanidade, Servizos á Comunidade, Electricidade e electrónica e Transporte e mantemento de vehículos, ademais de cursos online para adultos a través da Aula Mentor.