No encontro, o conselleiro solicitou ao alcalde información sobre as zonas de localización de soutos de castiñeiros dentro do termo municipal, con vistas a delimitar os seus perímetros e recuperar esa riqueza para os veciños. Así, a Xunta e o Concello traballarán para poñer en valor o Espazo Natural de Interese Local Loio-Ruxidoira, que conta con 437 hectáreas de extensión, co fin de aproveitar as posibilidades que ofrece especialmente pola riqueza dos seus soutos. Tamén se exploraron as oportunidades que ofrece o territorio municipal para o cultivo do viño na denominación de orixe Ribeira Sacra, dentro da subzona de Ribeiras do Miño.
Outro dos asuntos tratados foi a posibilidade de poñer en marcha un polígono agroforestal arredor do núcleo de Aldosende, o que permitirá proceder á actualización do catastro e á reorganización da propiedade para destinar os terreos a actividades gandeiras. Neste sentido, os responsables da Consellería destacaron que a Lei de recuperación da terra agraria de Galicia, actualmente en trámite no Parlamento, dará carta de natureza legal a este tipo de figuras, xunto a outras ferramentas como as aldeas modelo ou as agrupacións de xestión conxunta. Con todas elas perséguese optimizar e mellorar a produtividade dos terreos agrogandeiros e forestais, mediante o agrupamento e recuperación dos predios.
En relación co aproveitamento forestal, neste encontro abordouse tamén a posible inclusión dalgún dos soutos do municipio no rexistro de masas consolidadas de frondosas autóctonas. Este trámite permite aos titulares destes terreos ter prioridade nas axudas públicas para mellora silvícola das masas, así como beneficiarse de vantaxes fiscais na súa xestión.