O Sergas anuncia que realizará un cribado poboacional no concello de Paradela a vindeira fin de semana por mor da elevada incidencia. Serán citadas unhas 300 persoas de entre 30 e 70 anos co obxectivo de descubrir posibles asintomáticos.
O xerente da área sanitaria, Ramón Ares Rico, explicou que as probas PCR efectuaranse na tarde do venres e na mañá do sábado no centro de saúde, cun funcionamento similar ás xa realizadas no concello veciño da Pobra do Brollón.
Actualmente, hai 14 casos activos no municipio de Paradela, o que se traduce nunha incidencia acumulada de 750 casos por 100.000 habitantes nas últimas dúas semanas.
Segundo o acordado na última reunión do comité clínico, tanto Paradela como A Pobra do Brollón terán restricións de nivel máximo, o que implica peche perimetral.
