As rutas fluviais en catamarán polos ríos Sil e Miño postas en marcha pola Deputación de Lugo contan con case 800 reservas para a Semana Santa, conforme sinalou este mércores a deputada provincial de Turismo, Pilar García Porto.

Pilar García Porto destacou a gran acollida destas rutas, polas que navegan tres catamaráns, en Ponte do Sil (Monforte) e Belesar (Chantada). E estes “bos números” para esta campaña de Semana Santa vense acrecentados co total de reservas que xa se fixeron ata final de ano e que suman 1500.

García Porto puxo o acento na importancia de ditos itinerarios por estes dous ríos, que discorren fundamentalmente pola Ribeira Sacra como “elementos dinamizadores” do turismo na provincia. “Permítenos contemplar a paisaxe desde unha óptica diferente, desde os encoros, desde a auga e vendo o espectacular que é a paisaxe”, presumiu.

A deputada provincial tamén puxo en valor as medidas anticovid que levan a cabo nas embarcacións e que posibilitaron que, ao longo do ano pasado, non se rexistrase “ningún contaxio”.

Segundo indicou, os horarios, de mañá e tarde, van en función da “tempada” e, de momento estas rutas pódense facer de mércores a domingo aínda que no futuro xa se prolongarán toda a semana.

A viaxe, por calquera das dúas navegacións, pódese completar nunha hora e media entre ida e volta ás bases de Ponte do Sil, con dous catamaráns, e Belesar cun.