O Consello Económico e Social de Monforte recolle nos seus estatutos reunirse cada tres meses; desde a Secretaría de Acción Sindical de CC.OO. aseguran que levan 33 meses sen reunirse, “o que significa un grave incumprimento dos estatutos. Consideramos que o Sr. Alcalde demostra coa súa maioría absoluta un gran desprezo cara os axentes sociais (sindicatos, empresarios e asociacións) que conforman os mesmo, negándolles todo tipo de aportacións”, sinalan desde CC.OO.

Desde o sindicato aseguran non entender a actitude de José Tomé, tendo en conta que “foi sindicalista liberado durante moitos anos” e din non aceptar que o alcalde non esté de acordo cos estatutos do CES cando colaborou na súa redacción.

CC.OO. asegura que hai motivos suficientes para convocalo cada 3 meses e tratar cuestións como o plan de emprego, o modelo de cidade, o porto seco, infaestruturas, servizos sociais e outros. Insisten en que o problema do desemprego é prioritario, ao aumentar no último ano en 159 persoas no concello de Monforte, ata un total de 1.314 parados.

O sindicato apunta tamén que o anuncio do alcalde de contar con centos de empregados en Monforte pode ser como o anuncio da chegada de Pacadar ao porto seco de Monforte e aseguran que “estaremos vixiantes ante as expectativas non cumpridas que xeran frustración na cidadanía e desapego cara os nosos políticos. Hai 20 anos que se lle prometeron a Monforte moitas cousas e o que hai é unha Renfe-Adif cada vez con menos traballadores, un porto seco seco parado e unha chea de parcelas baleiras no polígono.”