Rafa Aguiar, locutor e xerente de Radio Monforte, pasou meses atrás pola dura experiencia de enfermar por Covid e saír adiante tras unha longa estancia no Hospital de Monforte, a piques incluso de ser enviado á UCI do HULA.

Dada a súa popularidade, tras moitos anos traballando en medios radiofónicos na cidade do Cabe, o seu ingreso hospitalario tivo moita transcendencia. “Chegáronme centos de mensaxes por todos os medios de xente que se preocupou por min”, comenta Rafa. O caso é que, grazas aos coidados médicos é ás ganas de vivir, superou a enfermidade e dende ese momento non parou de agradecer as mostras de agarimo da xente e a atención médica recibida no Hospital Comarcal de Monforte.

Tras pasar por este apuro vital ofrecéronlle contar a súa experiencia en público, e así foi como chegou ao Colexio Padres Escolapios de Monforte este pasado luns para sensibilizar ao alumnado sobre a Covid-19. Sen entrar nos detalles máis duros da súa vivencia contoulles como sen case decatarse viuse entubado nunha habitación do hospital e como se dá un conta do importante que é a sanidade en momentos así. Destacou a importancia para saír adiante deses coidados, máis alá dos médicos –sensibilidade, ánimo e motivación–, e tamén da autoconfianza para recuperarse.

O evento estivo guiado por un dos mestres do centro, Javier, e ademais desta experiencia Rafa Aguiar aproveitou tamén para falarlles ás rapazas e rapaces de Radio Monforte, un proxecto persoal que se convertiu na primeira emisora de radio por internet da zona. Tras explicarlles como xurdiu e o tipo de programación que fai, convidounos a participar con algún programa.