As 13 persoas infectadas de Covid-19, 11 usuarios e dous traballadores, no marco dun gromo rexistrado na residencia de maiores DomusVi Chantada “non presentan síntomas graves”. Así o manifestou o alcalde de Chantada, Manuel Varela, quen destacou que “se están facendo probas practicamente a diario” e este martes pasado a propia directora confirmoulle que “había 11 residentes asintomáticos e dous traballadores”.
Os casos víronse incrementados este martes, ao pasar de seis usuarios positivos e dous traballadores, a 11 maiores –ao sumar cinco máis entre os residentes–.
Varela confesou que tampouco causa moita “preocupación” o gromo e puntualizou que os afectados “están estupendamente, non presentan síntomas graves”.
“A preocupación é que nos poidan contaxiar aos demais. Agora están confinados ata que dean negativo”, abundou o alcalde de Chantada, Manuel Varela (PP). Respecto diso, afirmou que se vai “controlar” o gromo e así destaca que a propia directora da residencia lle trasladou que “desde a Consellería de Sanidade están a comportarse de maneira excepcional”.
Varela precisou que “están todos vacinados” e que, a pesar diso, “fanse probas de cando en vez, e é no contexto desas probas cando se detectaron os casos”. A residencia de Chantada, “unha das máis grandes de Galicia”, abundou, conta con 201 usuarios e entre “85 e 86 traballadores”.
