Albores Saúde Mental, entidade de referencia no Sur de Lugo para o colectivo de persoas e familias afectadas por enfermidades mentais e para o coidado da saúde mental da comunidade, busca con estes obradoiros mellorar a calidade de vida das persoas coidadoras.

As necesidades das persoas dependentes e/ou enfermas necesitan da atención diaria ininterrompida, para ser cubertas. Albores observa que a día de hoxe aínda segue a ser habitual que este tipo de responsabilidades se focalicen e sexan asumidas polas mulleres. “Aínda non demos o paso a que o resto da familia tome conciencia de que a sobrecarga e atención a tempo completo socava a saúde mental e física, e tome a iniciativa asumindo a súa parte de responsabilidade nos coidados” sinalan desde Albores.

Grazas ao programa Servizo Integral de Apoio ás Mulleres Coidadoras, financiado pola Consellería de Política Social da Xunta de Galicia, Fundación Mujeres impartirá un ciclo de 7 obradoiros semanas dirixidos ás mulleres coidadoras de Albores. As sesións terán lugar en Monforte de Lemos todos os xoves en horario de 11:00 a 13:00 horas, ata o 17 de xuño. Nas mesmas trabállanse habilidades de saúde e autocoidado das coidadoras, relaxación e conciencia corporal, xestión do tempo, corresponsabilidade e establecemento de límites nas relacións familiares, entre outros

O programa desenvólvese nas instalacións da Escola Infantil San Vicente de Paul, que son cedidas por Diego Rosales Galiñanes, Director da mesma.

O acollemento da iniciativa foi moi bo, así que a Asociación Albores prevé organizar máis xornadas deste tipo tras o verán, e na/s próximas ocasión/s dirixilas ás mulleres coidadoras doutros colectivos (maiores, menores, persoas con outro tipo de discapacidades…), coa finalidade de coidar da súa saúde mental, rebaixando o estrés e a sobrecarga. Para inscribirse,  todas aquelas persoas interesadas poden contactar no 982404968 ou en albores@albores.org