Este mércores, 26 de maio, celebrouse conciliación no SMAC de Lugo promovido por tres traballadoras do Centro do Viño de Monforte de Lemos, acompañadas pola avogada monfortina Mª Teresa García de Lombas Tapia. Aseguran as traballadoras que o representante da nova empresa adxudicataria ía acompañado pola súa nai, “a histórica militante do PSOE e actual membro da Corporación, Margarita López Rodríguez.”

Segunso as traballadoras, a nova empresa limitouse a dicir que aínda non asinaran o contrato co Concello. “Confiamos en que se garantan os nosos dereitos, sería empezar con moi mal pé saltarse a lei deixándonos tiradas na rúa. Confiamos en que o Alcalde faga que finalmente triunfe a Xustiza e non nos obrigue a presentar denuncia,” engaden as traballadoras.

Insisten as traballadoras do Centro do Viño en que o Convenio ao que están acollidas dalles dereito á subrogación. O Convenio Colectivo de Lecer e Actividades Socioculturais no Artigo 37 recolle: “Dereito de subrogación. Con obxecto de favorecer a estabilidade no emprego, incluído no ámbito deste Convenio, afectado pola dinámica de substitución de adxudicatarios nos contratos, establécese o presente artigo, en virtude do cal a adxudicación dun contrato a unha entidade ou empresa para a xestión dun centro, servizo ou programa que viña sendo xestionado anteriormente por outra entidade, supoñerá o mantemento do emprego a través da subrogación e das novas contratacións, nos termos que se desenvolven neste artigo. O mecanismo de subrogación, definido no presente artigo, operará automaticamente con independencia do tipo e/ou natureza e/ou personalidade da empresa ou entidade de que se trate, xa sexa persoa/entidade física, xurídica ou de calquera clase.”